ਥਿਤੀ (ਕਬੀਰ ਜੀ)

ਅਠਵੀਂ ਥਿਤ ਦੁਆਰਾ ਉਪਦੇਸ਼ ਦਿੰਦਿਆਂ ਭਗਤ ਕਬੀਰ ਜੀ ਦੱਸਦੇ ਹਨ ਕਿ ਦੇਹੀ ਅਠਾਂ ਧਾਤਾਂ ਤੋਂ ਮਿਲ ਕੇ ਬਣੀ ਹੈ। ਇਹ ਸਾਰੇ ਧਾਤੂ ਪਿਛੋਂ ਪੰਜ ਤੱਤਾਂ ਦੇ ਬਣੇ ਹੁੰਦੇ ਹਨ। ਪੰਜ ਤੱਤਾਂ ਨਾਲ ਬਣੀਆਂ ਅੱਠ ਧਾਤਾਂ ਵਾਲੇ ਇਸ ਸਰੀਰ ਵਿਚ ਹੀ ਪ੍ਰਭੂ ਦਾ ਵਾਸਾ ਹੈ। ਉਹ ਪ੍ਰਭੂ ਜਿਸ ਦਾ ਕੋਈ ਵਿਸ਼ੇਸ਼ ਪਰਵਾਰ ਨਹੀਂ ਹੈ ਤੇ ਨਾ ਹੀ ਜਿਸ ਦੀ ਕੋਈ ਵੰਸ਼ ਹੈ। ਅਸਲ ਵਿਚ ਉਹ ਸਭ ਤੋਂ ਵਡਾ ਹੈ, ਜਿਸ ਕਰਕੇ ਉਹ ਸਾਰੇ ਖਜਾਨਿਆ ਦਾ ਮਾਲਕ ਹੈ।

ਪਰ ਇਸ ਗੱਲ ਦੀ ਸਮਝ ਆਉਣੀ ਬਹੁਤ ਮੁਸ਼ਕਲ ਹੈ। ਇਹ ਗਿਆਨ ਸਿਰਫ ਗੁਰੂ ਕੋਲ ਹੀ ਹੁੰਦਾ ਹੈ। ਇਸ ਕਰਕੇ ਗੁਰੂ ਕੋਲ ਗਿਆਂ ਜਿਹੜਾ ਗਿਆਨ ਪ੍ਰਾਪਤ ਹੁੰਦਾ ਹੈ, ਉਸ ਗਿਆਨ ਤੋਂ ਹੀ ਇਹ ਭੇਤ ਖੁੱਲ੍ਹਦਾ ਹੈ ਕਿ ਪ੍ਰਭੂ ਸਭ ਕਾਸੇ ਦਾ ਮਾਲਕ ਹੈ ਤੇ ਉਹ ਮਨੁਖਾ ਦੇਹੀ ਅੰਦਰ ਹੀ ਵਸਦਾ ਹੈ।

ਅਖੀਰ ਵਿਚ ਭਗਤ ਕਬੀਰ ਜੀ ਦੱਸਦੇ ਹਨ ਕਿ ਗੁਰੂ ਗਿਆਨ ਸਦਕਾ ਫਿਰ ਜੋ ਜੀਵ ਆਪਣੀ ਬ੍ਰਿਤੀ ਨੂੰ ਸੰਸਾਰ ਵੱਲੋਂ ਮੋੜ ਕੇ, ਪ੍ਰਭੂ ਵਾਲੇ ਪਾਸੇ ਜੋੜ ਲੈਂਦਾ ਹੈ, ਭਾਵ ਸਰੀਰਿਕ ਮੋਹ ਤੋਂ ਉਪਰ ਉੱਠ ਕੇ, ਰੱਬੀ ਗੁਣਾਂ ਨੂੰ ਜੀਵਨ ਵਿੱਚ ਕਮਾਉਂਦਾ ਹੈ, ਉਹ ਫਿਰ ਸਭ ਖਜਾਨਿਆਂ ਦੇ ਮਾਲਕ, ਅਵਿਨਾਸ਼ੀ ਅਤੇ ਨਾ ਵਿੰਨ੍ਹੇ ਜਾ ਸਕਣ ਵਾਲੇ ਪ੍ਰਭੂ ਦਾ ਹੀ ਰੂਪ ਹੋ ਜਾਂਦਾ ਹੈ।