ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਪਿਛਲੇ ਸਲੋਕ ਦੇ ਵਿਚਾਰ ਨੂੰ ਹੋਰ ਅੱਗੇ ਤੋਰਦਿਆਂ ਬਾਬਾ ਫਰੀਦ ਜੀ ਸਮਝਾ ਰਹੇ ਹਨ ਕਿ ਜਿਹੜਾ ਸਿਰ ਆਪਣੇ ਮਾਲਕ ਪ੍ਰਭੂ ਅੱਗੇ ਨਿਮਰਤਾ, ਸਤਿਕਾਰ ਅਤੇ ਸਮਰਪਣ ਵਿਚ ਝੁਕਦਾ ਹੀ ਨਹੀਂ, ਉਹ ਸਿਰ ਏਨਾ ਨਿਕੰਮਾ ਹੈ ਕਿ ਹੋਰ ਕਿਸੇ ਕੰਮ ਨਹੀਂ ਆ ਸਕਦਾ ਤੇ ਉਸ ਨੂੰ ਕਰਨਾ ਵੀ ਕੀ ਹੈ? ਫਾਰਸੀ ਵਿਚ ਸਿਰ ਦਾ ਅਰਥ ਮੁੱਖੀ ਹੈ ਤੇ ਮੁੱਖੀ ਹੋਣ ਵਿਚ ਹਉਮੈ ਦੀ ਝਲਕ ਹੈ। ਇਸ ਲਈ ਹੀ ਸਿਰ ਨੂੰ ਨਿਮਰ ਭਾਵ ਵਿਚ ਰਹਿਣ ਲਈ ਪ੍ਰੇਰਤ ਕੀਤਾ ਗਿਆ ਹੈ।

ਮਾਲਕ ਪ੍ਰਭੂ ਅੱਗੇ ਨਾ ਝੁਕਣ ਵਾਲੇ ਸਿਰ ਨੂੰ, ਬਾਲਣ ਦੀ ਥਾਂ, ਤੌੜੀ ਦੇ ਹੇਠਾਂ, ਚੁੱਲ੍ਹੇ ਵਿਚ ਬਾਲ ਲੈਣਾ ਚਾਹੀਦਾ ਹੈ। ਇਥੇ ਵੀ ਬਾਬਾ ਫਰੀਦ ਜੀ ਦਾ ਭਾਵ ਸਿਰ ਨੂੰ ਸੱਚਮੁਚ ਚੁੱਲ੍ਹੇ ਵਿਚ ਬਾਲਣਾ ਨਹੀਂ ਹੈ। ਬਲਕਿ ਨਿਮਰਤਾ ਅਤੇ ਸਮਰਪਣ ਦੇ ਭਾਵ ਵਿਚ ਨਮਾਜ਼ ਅਦਾ ਕਰਨ ਦੀ ਅਹਿਮੀਅਤ ਉਜਾਗਰ ਕਰਨਾ ਹੀ ਹੈ, ਕਿਉਂਕਿ ਉਨ੍ਹਾਂ ਦੇ ਅਨੁਸਾਰ ਨਿਮਰਤਾ ਤੇ ਪ੍ਰੇਮ ਬਿਨਾਂ ਜੀਵਨ ਕਿਸੇ ਕੰਮ ਨਹੀਂ ਹੈ।