ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਸਵੇਰ ਵੇਲੇ ਜਦ ਮੁਸਲਮਾਨ ਦੇ ਕੰਨ ਵਿਚ ਅਜਾਨ ਸੁਣਾਈ ਦਿੰਦੀ ਹੈ ਕਿ ਨਮਾਜ਼ ਨੀਂਦ ਤੋਂ ਬਿਹਤਰ ਹੈ ਤਾਂ ਮਨ ਵਿਚ ਉੱਠਣ ਜਾਂ ਨਾ ਉੱਠਣ ਦੀ ਦੁਵਿਧਾ ਸ਼ੁਰੂ ਹੋ ਜਾਂਦੀ ਹੈ। ਅਜਿਹੀ ਦੁਚਿਤੀ ਵਿਚ ਪਏ ਹੋਏ ਆਲਸੀ ਲੋਕਾਂ ਨੂੰ ਬਾਬਾ ਫਰੀਦ ਜੀ ਸਮਝਾ ਰਹੇ ਹਨ ਕਿ ਉਹ ਬਿਸਤਰੇ ਵਿਚ ਪਏ ਹੀ ਨਾ ਰਹਿਣ, ਬਲਕਿ ਉੱਠ ਪੈਣ। ਕਿਉਂਕਿ ਕਈ ਲੋਕ ਸਵੇਰੇ ਜਾਗ ਕੇ ਵੀ ਬਿਸਤਰੇ ਵਿਚ ਹੀ ਪਏ ਰਹਿੰਦੇ ਹਨ ਤੇ ਆਲਸ ਕਾਰਣ ਜਲਦੀ ਉੱਠਦੇ ਹੀ ਨਹੀਂ। ਇਸ ਲਈ ਬਾਬਾ ਫਰੀਦ ਜੀ ਕਹਿੰਦੇ ਹਨ ਕਿ ਉਹ ਉੱਠ ਕੇ ਮੂੰਹ-ਹੱਥ ਧੋ ਕੇ ਸਵੇਰ ਦੀ ਨਮਾਜ਼ ਪੜ੍ਹਨ। ਇਹ ਉੱਦਮ ਸਿਰਫ ਸਵੇਰ ਵੇਲੇ ਉੱਠਣ ਤਕ ਸੀਮਤ ਨਹੀਂ ਹੈ, ਬਲਕਿ ਸਮੁੱਚੇ ਜੀਵਨ ਦੀ ਸਵੇਰ ਸਮੇਂ ਸੁਚੇਤ ਹੋਣ ਤੋਂ ਲੈ ਕੇ ਹਰ ਸਮੇਂ ਚੇਤੰਨ ਰਹਿਣ ਦੀ ਪ੍ਰੇਰਨਾ ਦਿੰਦਾ ਹੈ।

ਫਿਰ ਦੱਸਦੇ ਹਨ ਕਿ ਜੋ ਨਮਾਜ਼ ਵਿਚ ਆਪਣੇ ਮਾਲਕ ਪ੍ਰਭੂ ਅੱਗੇ ਸਿਰ ਨਹੀਂ ਝੁਕਾਉਂਦਾ ਉਹ ਸਿਰ ਤਾਂ ਦੇਹੀ ਨਾਲੋਂ ਕੱਟ ਕੇ ਅਲਹਿਦਾ ਕਰ ਦੇਣਾ ਚਾਹੀਦਾ ਹੈ। ਚੇਤੇ ਰਹੇ ਕਿ ਮੁਕੀਆਂ ਮਾਰਨ ਵਾਲਿਆਂ ਦੇ ਪੈਰ ਚੁੰਮਣ ਦੀ ਸਿਖਿਆ ਦੇਣ ਵਾਲੇ ਬਾਬਾ ਫਰੀਦ ਜੀ ਨਮਾਜ਼ ਅਦਾ ਨਾ ਕਰਨ ਵਾਲਿਆਂ ਦਾ ਸਿਰ ਅਲਹਿਦਾ ਕਰਨ ਲਈ ਆਖ ਰਹੇ ਹਨ। ਇਸ ਦਾ ਸਿਰਫ ਮਤਲਬ ਨਮਾਜ਼ ਦੀ ਅਹਿਮੀਅਤ ਨੂੰ ਦਰਸਾਉਣਾ ਹੈ, ਸਚਮੁੱਚ ਕਤਲ ਕਰਨਾ ਨਹੀਂ ਹੋ ਸਕਦਾ। ਇਥੇ ਨਮਾਜ਼ ਵਿਚ ਵੀ ਜੀਵਨ ਭਰ ਪ੍ਰਭੂ ਪ੍ਰੇਮ ਭਗਤੀ ਵਿਚ ਲੀਨ ਰਹਿਣ ਦੀ ਸੰਕੇਤਕ ਹੈ।