ਚਉਬੋਲੇ

ਗੁਰੂ ਅਰਜਨ ਸਾਹਿਬ

ਇਸ ਸਲੋਕ ਵਿਚ ਪ੍ਰਭੂ ਦੇ ਸਰਗੁਣ ਸਰੂਪ ਦਾ ਜਿਕਰ ਕੀਤਾ ਗਿਆ ਹੈ ਕਿ ਉਸ ਦੀਆਂ ਅੱਖਾਂ ਕਮਲ ਜਿਹੀਆਂ ਹਨ, ਜਿਨ੍ਹਾਂ ਵਿਚ ਕਾਲਾ ਕੱਜਲ ਪਾਇਆ ਹੋਇਆ ਹੈ। ਉਸ ਦਾ ਚਿਹਰਾ ਚੰਨ ਦੀ ਚਾਨਣੀ ਜਿਹਾ ਹੈ ਤੇ ਉਸ ਦਾ ਦਿਲ ਬੜਾ ਹੀ ਸੋਹਣਾ ਹੈ।

ਫਿਰ ਮੂਸਨ ਨੂੰ ਸਮਝਾਇਆ ਗਿਆ ਹੈ ਕਿ ਉਹ ਪ੍ਰਭੂ ਦੇ ਮਿਲਾਪ ਦਾ ਭੇਦ ਜਾਣੇ ਅਤੇ ਪ੍ਰਭੂ ਵਿਚ ਅਭੇਦ ਹੋ ਜਾਵੇ। ਉਸ ਪ੍ਰਭੂ ਸਾਹਮਣੇ ਸੰਸਾਰ ਦੇ ਸਾਰੇ ਹਾਰ-ਸ਼ਿੰਗਾਰ ਫਿੱਕੇ ਹਨ। ਇਸ ਲਈ ਉਹ ਆਪਣੀ ਬਾਹਰੀ ਦਿੱਖ ਦੀ ਬਜਾਏ ਅੰਦਰੂਨੀ ਗੁਣਾਂ ਵੱਲ ਧਿਆਨ ਦੇਵੇ ਅਤੇ ਪ੍ਰਭੂ ਨੂੰ ਖੁਸ਼ ਕਰਨ ਲਈ ਬਾਹਰੀ ਸ਼ਿੰਗਾਰ ਵਜੋਂ ਪ੍ਰੋਏ ਹੋਏ ਹਾਰ ਦੇ ਟੁਕੜੇ-ਟੁਕੜੇ ਕਰ ਦੇਵੇ। ਕਿਉਂਕਿ ਪ੍ਰੇਮ ਵਿਚ ਬਾਹਰੀ ਹਾਰ-ਸ਼ਿੰਗਾਰ ਦਾ ਕੋਈ ਮੁੱਲ ਨਹੀਂ। ਭਾਵ, ਹਾਰ-ਸ਼ਿੰਗਾਰ ਆਦਿਕ ਬਾਹਰੀ ਅਡੰਬਰਾਂ ਨੂੰ ਆਪਣੇ ਅਤੇ ਪ੍ਰਭੂ ਵਿਚ ਰਤਾ ਜਿੰਨੀ ਵੀ ਵਿਥ ਨਾ ਪਾਉਣ ਦੇਵੇ।