ਬਾਰਹ ਮਾਹਾ (ਮਹਲਾ ੫)

ਗੁਰੂ ਅਰਜਨ ਸਾਹਿਬ

ਵੈਸਾਖ ਦੇ ਮਹੀਨੇ ਵਿਚ ਮੌਸਮ ਸੁਹਾਵਣਾ ਹੁੰਦਾ ਹੈ ਤੇ ਫਸਲਾਂ ਪੱਕਣੀਆਂ ਸ਼ੁਰੂ ਹੋ ਜਾਂਦੀਆਂ ਹਨ। ਇਸ ਪਦੇ ਵਿਚ ਵੈਸਾਖ ਦੇ ਮਹੀਨੇ ਦੁਆਰਾ ਉਪਦੇਸ਼ ਕੀਤਾ ਗਿਆ ਹੈ ਕਿ ਖੁਸ਼ੀਆਂ ਭਰੇ ਇਸ ਮਹੀਨੇ ਵਿਚ ਵੀ ਪ੍ਰਭੂ ਤੋਂ ਵਿਛੜੇ ਮਨੁਖ ਦੁਖੀ ਹੀ ਰਹਿੰਦੇ ਹਨ। ਪ੍ਰਭੂ ਦੇ ਨਾਮ-ਸਿਮਰਨ ਤੋਂ ਬਿਨਾਂ ਉਹ ਹੋਰ ਜਿੰਨੇ ਵੀ ਕਰਮ ਕਰਦੇ ਹਨ, ਸਭ ਵਿਅਰਥ ਹਨ। ਉਹ ਉਨ੍ਹਾਂ ਦੇ ਆਤਮਕ ਜੀਵਨ ਦੇ ਵਿਕਾਸ ਲਈ ਸਹਾਈ ਨਹੀਂ ਹੁੰਦੇ। ਮਨੁਖ ਦਾ ਸਦੀਵੀ ਸਾਥੀ ਕੇਵਲ ਪ੍ਰਭੂ ਹੈ। ਜੋ ਪ੍ਰਭੂ ਨੂੰ ਹਰ ਵੇਲੇ ਯਾਦ ਰਖਦੇ ਹਨ, ਉਹ ਹਰ ਥਾਂ ਸੋਭਾ ਪਾਉਂਦੇ ਹਨ।