ਬਾਬਰ ਦੇ ਹਮਲੇ ਸੰਬੰਧੀ ਉਚਾਰੇ ਸ਼ਬਦ (ਬਾਬਰਵਾਣੀ)

ਗੁਰੂ ਨਾਨਕ ਸਾਹਿਬ

ਗੁਰੂ ਨਾਨਕ ਸਾਹਿਬ ਦੁਆਰਾ ਆਸਾ ਰਾਗ ਵਿਚ ਉਚਾਰਿਆ ਇਹ ਸ਼ਬਦ ਗੁਰੂ ਗ੍ਰੰਥ ਸਾਹਿਬ ਦੇ ਪੰਨਾ ੪੧੭-੧੮ ਉਪਰ ਦਰਜ ਹੈ। ਇਸ ਦੇ ੭ ਬੰਦ ਹਨ। ‘ਰਹਾਉ’ ਦਾ ਇਕ ਬੰਦ ਇਨ੍ਹਾਂ ਤੋਂ ਵਖਰਾ ਹੈ। ਇਹ ਸ਼ਬਦ ਰੱਬੀ ਉਪਦੇਸ਼ ਦੇ ਨਾਲ-ਨਾਲ ਹਿੰਦੁਸਤਾਨ (ਉੱਤਰੀ ਭਾਰਤ ਦਾ ਫ਼ਾਰਸੀ ਨਾਂ) ਉਤੇ ਬਾਬਰ (੧੪੮੩-੧੫੩੦ ਈ.) ਦੇ ਹਮਲੇ ਦੀ ਜਾਣਕਾਰੀ ਵੀ ਦਿੰਦਾ ਹੈ। ਇਸ ਹਮਲੇ ਦੇ ਵਰਣਨ ਰਾਹੀਂ ਗੁਰੂ ਸਾਹਿਬ ਮਾਇਕੀ ਪਦਾਰਥਾਂ ਦੀ ਖਿਣ/ਛਿਣ ਭੰਗਰਤਾ ਨੂੰ ਦਰਸਾਉਂਦੇ ਹੋਏ ਇਲਾਹੀ ਹੁਕਮ ਨੂੰ ਅਟੱਲ ਮੰਨਦੇ ਹਨ। ਇਸ ਸ਼ਬਦ ਵਿਚ ਗੁਰੂ ਸਾਹਿਬ ਫਰਮਾਉਂਦੇ ਹਨ ਕਿ ਇਹ ਸੰਸਾਰ ਅਕਾਲ ਪੁਰਖ ਦਾ ਰਚਿਆ ਖੇਲ-ਤਮਾਸ਼ਾ ਹੈ। ਉਸ ਦਾ ਹੁਕਮ ਇਕ ਘੜੀ ਵਿਚ ਜੀਵਾਂ ਨੂੰ ਸਥਾਪਤ ਕਰਕੇ ਵਿਸਥਾਪਤ ਕਰ ਦਿੰਦਾ ਹੈ। ਇਸ ਗੱਲ ਦੀ ਪ੍ਰੋੜਤਾ ਲਈ ਗੁਰੂ ਸਾਹਿਬ ਸੈਦਪੁਰ ਦਾ ਜ਼ਿਕਰ ਕਰਦੇ ਹਨ, ਜਿਥੇ ਕੁਝ ਦਿਨ ਪਹਿਲਾਂ ਰੌਣਕਾਂ ਲੱਗੀਆਂ ਹੋਈਆਂ ਸਨ, ਪਰ ਹੁਣ ਉਥੇ ਕੇਵਲ ਤਬਾਹੀ ਦਾ ਹੀ ਮੰਜ਼ਰ ਹੈ।