ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਗੁਰੂ ਅਰਜਨ ਸਾਹਿਬ, ਬਾਬਾ ਫਰੀਦ ਜੀ ਦੇ ਪਿਛਲੇ ਸਲੋਕ ਦੇ ਸੰਬੰਧ ਵਿਚ, ਉਸੇ ਲਹਿਜੇ ਵਿਚ ਹੀ, ਆਪਣਾ ਪਖ ਦੱਸਦੇ ਹਨ ਕਿ ਸਾਰੀ ਧਰਤੀ ਇਕੋ ਜਿਹੀ ਨਹੀਂ, ਬਲਕਿ ਬਹੁ-ਰੰਗੀ ਹੈ। ਬਹੁ-ਰੰਗੀ ਹੋਣ ਦਾ ਭਾਵ ਦੁਨੀਆ ਸੋਹਣੀ ਅਤੇ ਸੁਖਦਾਈ ਹੈ। ਪਰ ਇਸ ਦੇ ਅੰਦਰ ਹੀ ਵਿਸ਼ੇ-ਵਿਕਾਰਾਂ ਦਾ ਬਾਗ ਹੈ। ਜੋ ਵੀ ਸੰਸਾਰ ਦੇ ਦੁਖ ਹਨ ਉਹ ਸਭ ਇਸ ਬਾਗ ਕਰਕੇ ਹੀ ਹਨ। ਅਗਿਆਨਤਾ ਕਾਰਣ ਲੋਕ ਇਸ ਜ਼ਹਿਰੀਲੇ ਬਾਗ ਵੱਲ ਖਿੱਚੇ ਜਾਂਦੇ ਹਨ ਤੇ ਫਿਰ ਦੁਖ ਪਾਉਂਦੇ ਹਨ। 

ਕੀ ਇਨ੍ਹਾਂ ਵਿਸ਼ੇ-ਵਿਕਾਰਾਂ ਕਾਰਣ ਜੀਵਨ ਵਿਚ ਪੈਦਾ ਹੋਣ ਵਾਲੇ ਦੁਖਾਂ ਤੋਂ ਬਚਿਆ ਜਾ ਸਕਦਾ ਹੈ? ਇਸ ਸੁਆਲ ਦਾ ਜੁਆਬ ਅਗਲੀ ਤੁਕ ਵਿਚ ਦਿੰਦਿਆਂ ਗੁਰੂ ਅਰਜਨ ਸਾਹਿਬ ਦੱਸਦੇ ਹਨ ਕਿ ਕੇਵਲ ਉਹੀ ਲੋਕ ਇਨ੍ਹਾਂ ਦੁਖ ਤਕਲੀਫਾਂ ਦੇ ਪ੍ਰਭਾਵ ਤੋਂ ਬਚਦੇ ਹਨ ਅਤੇ ਜੀਵਨ ਵਿਚ ਔਖੇ ਤੋਂ ਔਖੇ ਸਮੇਂ ਅੰਦਰ ਵੀ ਢਹਿੰਦੀ ਕਲਾ ਵਿਚ ਨਹੀ ਜਾਂਦੇ ਜਿਨ੍ਹਾਂ ‘ਤੇ ਗੁਰੂ ਪਰਮੇਸ਼ਰ ਦੀ ਮਿਹਰ ਹੋ ਜਾਂਦੀ ਹੈ। ਜਿਸ ਨੂੰ ਸ਼ਬਦ ਦੁਆਰਾ ਗਿਆਨ ਦੀ ਪ੍ਰਾਪਤੀ ਹੋਈ, ਉਹੀ ਵਿਸ਼ੇ-ਵਿਕਾਰਾਂ ਦੇ ਬਾਗ ਵਿਚਲੀ ਜ਼ਹਿਰ ਤੋਂ ਬਚ ਸਕੇ ਹਨ। ਬਾਕੀ ਸਭ ਇਸ ਜ਼ਹਿਰ ਨੇ ਗਾਲ ਕੇ ਖਤਮ ਕਰ ਦਿੱਤੇ ਹਨ। ਗੁਰੂ ਹੀ ਇਸ ਜ਼ਹਿਰ ਤੋਂ ਬਚਾਉਣ ਦੀ ਸਮਰੱਥਾ ਰਖਦਾ ਹੈ।