ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਬਾਬਾ ਫਰੀਦ ਜੀ ਉਸ ਆਮ ਮਨੁਖ ਦੀ ਮਨੋ-ਅਵਸਥਾ ਬਿਆਨ ਕਰ ਰਹੇ ਹਨ, ਜਿਸ ਨੂੰ ਲੱਗਦਾ ਹੈ ਕਿ ਸਿਰਫ ਉਸ ਦੇ ਜੀਵਨ ਵਿਚ ਹੀ ਦੁਖ-ਤਕਲੀਫਾਂ ਹਨ ਤੇ ਬਾਕੀ ਸਾਰੇ ਬੜੇ ਸੁਖੀ ਵਸਦੇ ਹਨ। ਪਰ ਜਦ ਉਹ ਆਪਣੇ ਨਿਜਤਵ ਤੋਂ ਉਪਰ ਉਠ ਕੇ ਸੰਸਾਰ ਵੱਲ ਦੇਖਦਾ ਹੈ ਤਾਂ ਉਸ ਨੂੰ ਉਹੋ ਜਿਹੀਆਂ ਦੁਖ-ਤਕਲੀਫਾਂ ਹਰ ਘਰ ਵਿਚ ਹੀ ਦਿਖਾਈ ਦਿੰਦੀਆਂ ਹਨ, ਜਿਹੋ-ਜਿਹੀਆਂ ਉਹ ਆਪਣੇ ਜੀਵਨ ਵਿਚ ਹੰਢਾਅ ਰਿਹਾ ਹੈ। ਉਸ ਨੂੰ ਮਹਿਸੂਸ ਹੁੰਦਾ ਹੈ ਕਿ ਜਿਵੇਂ ਇਹ ਸੰਸਾਰ ਦੁਖਾਂ ਦਾ ਘਰ ਹੈ ਤੇ ਇਸ ਵਿਚ ਕੋਈ ਵੀ ਅਜਿਹਾ ਨਹੀਂ ਹੈ, ਜਿਸ ਦੇ ਜੀਵਨ ਵਿਚ ਦੁਖ ਨਾ ਹੋਣ। ਪਰ ਆਪਣੇ ਨਿਜਤਵ ਕਾਰਣ ਹਰ ਕਿਸੇ ਨੂੰ ਸਿਰਫ ਆਪਣਾ ਹੀ ਦੁਖ ਨਜਰ ਆਉਂਦਾ ਹੈ, ਦੂਸਰੇ ਦਾ ਨਹੀਂ। ਜਦ ਪਤਾ ਲੱਗਦਾ ਹੈ ਕਿ ਸਾਰੇ ਹੀ ਦੁਖੀ ਹਨ ਤਾਂ ਮਨੁਖ ਨੂੰ ਲੱਗਦਾ ਹੈ ਕਿ ਉਸ ਦੇ ਨਾਲ ਕੁਝ ਵਖਰਾ ਨਹੀਂ ਹੋ ਰਿਹਾ। ਉਹ ਸਾਰੇ ਸੰਸਾਰ ਦੇ ਨਾਲ ਹੀ ਹੈ।