ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਬਾਬਾ ਫਰੀਦ ਜੀ ਨੇ ਮਨ ਵਿਚ ਉਪਜਣ ਵਾਲੇ ਪ੍ਰੇਮ ਅਤੇ ਦਵੈਸ਼ ਆਦਿ ਉੱਚੇ-ਨੀਵੇਂ ਭਾਵਾਂ ਦੇ ਅਸਰ ਤੋਂ ਬਚਣ ਲਈ ਮਨੁਖ ਨੂੰ ਉਪਦੇਸ਼ ਕੀਤਾ ਹੈ ਕਿ ਉਸ ਨੂੰ ਆਪਣਾ ਮਨ ਮੈਦਾਨ ਦੀ ਤਰ੍ਹਾਂ ਇਕਸਾਰ ਪੱਧਰਾ ਕਰ ਲੈਣਾ ਚਾਹੀਦਾ ਹੈ। ਉਸ ਨੂੰ ਆਪਣੇ ਮਨ ਵਿਚ, ਟੋਏ ਟਿੱਬਿਆਂ ਦੀ ਤਰ੍ਹਾਂ ਬਣੇ ਹੋਏ ਊਚ-ਨੀਚ ਦੇ ਸਾਰੇ ਭਾਵ ਲਾਹ ਸੁਟਣੇ ਚਾਹੀਦੇ ਹਨ। ਉਸ ਨੂੰ ਦੂਈ-ਦ੍ਵੈਸ਼ ਅਤੇ ਮੇਰ-ਤੇਰ ਦਾ ਤਿਆਗ ਕਰ ਦੇਣਾ ਚਾਹੀਦਾ ਹੈ ਤੇ ਹਰ ਕਿਸੇ ਨਾਲ ਇਕੋ ਜਿਹਾ ਮਾਣ-ਇੱਜ਼ਤ ਤੇ ਸਤਿਕਾਰ ਵਾਲਾ ਵਿਵਹਾਰ ਕਰਨਾ ਚਾਹੀਦਾ ਹੈ। ਕਿਉਂਕਿ ਰੱਬ ਦੇ ਪੈਦਾ ਕੀਤੇ ਹੋਏ ਸਾਰੇ ਜੀਵ ਇਕ ਸਮਾਨ ਹੀ ਹਨ।

ਫਿਰ ਦੱਸਿਆ ਹੈ ਕਿ ਜੇ ਮਨੁਖ ਆਪਣੇ ਅੰਦਰੋਂ ਊਚ-ਨੀਚ ਦੇ ਸਾਰੇ ਭਾਵ ਮੇਟ ਲਵੇਗਾ ਤਾਂ ਉਸ ਨੂੰ ਜੀਵਨ ਦੇ ਅੰਤ ਵਿਚ ਰੱਬ ਦੇ ਦਰਬਾਰ ਵਿਚ ਦੋਜ਼ਖ ਦੀ ਅੱਗ ਦਾ ਸੇਕ ਤਕ ਨਹੀਂ ਪੁੱਜੇਗਾ। ਊਚ-ਨੀਚ ਦਾ ਭਾਵ ਮਨੁਖ ਲਈ ਬੇਹਦ ਘਾਤਕ ਹੈ, ਜਿਸ ਨੂੰ ਹਰ ਹਾਲਤ ਵਿਚ ਮੇਟਣਾ ਜ਼ਰੂਰੀ ਹੈ। ਇਸ ਸਲੋਕ ਰਾਹੀ ਮਨੁਖ ਨੂੰ ਇਕਸੁਰਤਾ ਵਿਚ ਵਿਚਰਣ ਲਈ ਪ੍ਰੇਰਤ ਕੀਤਾ ਗਿਆ ਹੈ।