ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਬਾਬਾ ਫਰੀਦ ਜੀ ਸਮਝਾ ਰਹੇ ਹਨ ਕਿ ਜੇ ਕਿਤੇ ਹੰਸ ਕੋਧਰੇ ਦੀ ਫਸਲ ਉੱਤੇ ਜਾ ਬੈਠੇ ਤਾਂ ਮੂਰਖ ਲੋਕ ਉਸ ਨੂੰ ਉਡਾਉਣ ਲੱਗ ਪੈਂਦੇ ਹਨ। ਉਹ ਸੋਚਦੇ ਹਨ ਕਿ ਕਿਤੇ ਉਹ ਉਨ੍ਹਾਂ ਦੀ ਫਸਲ ਦਾ ਨੁਕਸਾਨ ਹੀ ਨਾ ਕਰ ਦੇਵੇ। ਪਰ ਉਨ੍ਹਾਂ ਮੂਰਖਾਂ ਨੂੰ ਇਹ ਨਹੀਂ ਪਤਾ ਹੁੰਦਾ ਕਿ ਹੰਸ ਤਾਂ ਕਦੇ ਕੋਧਰਾ ਖਾਂਦਾ ਹੀ ਨਹੀਂ। 

ਉਪਰੋਕਤ ਉਦਾਹਰਣ ਦੁਆਰਾ ਬਾਬਾ ਫਰੀਦ ਜੀ ਨੇ ਸਮਝਦਾਰ, ਸੂਝਵਾਨ ਤੇ ਵਿਵੇਕਸ਼ੀਲ ਲੋਕਾਂ ਦੀ ਸਿਫਤ ਦੱਸੀ ਹੈ ਕਿ ਉਹ ਆਪਣਾ ਗੁਣ ਹਮੇਸ਼ਾ ਕਾਇਮ ਰਖਦੇ ਹਨ ਤੇ ਕਦੇ ਬੁਰਾਈ ਵਿਚ ਖਚਿਤ ਨਹੀਂ ਹੁੰਦੇ। ਉੱਚੇ ਇਖਲਾਕ ਵਾਲੇ ਮਨੁਖ ਜੇਕਰ ਭੈੜੀ ਥਾਂ ਚਲੇ ਵੀ ਜਾਣ ਤਾਂ ਲੋਕ ਬੇਵਜਾ ਜਿਥੇ ਉਨ੍ਹਾਂ ਨੂੰ ਮੱਤ ਦੇਣੀ ਹੀ ਸ਼ੁਰੂ ਨਹੀਂ ਕਰਦੇ ਸਗੋਂ ਉਨ੍ਹਾਂ ਦੀ ਨਿੰਦਿਆ ਵੀ ਕਰਨੀ ਸ਼ੁਰੂ ਕਰ ਦਿੰਦੇ ਹਨ। ਪਰ ਉਹ ਨਹੀਂ ਜਾਣਦੇ ਕਿ ਸੂਝਵਾਨ ਮਨੁਖ ਮਾੜੀ ਥਾਂ ਦਾ ਪ੍ਰਭਾਵ ਨਹੀ ਕਬੂਲਦੇ।