ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਬਾਬਾ ਫਰੀਦ ਜੀ ਸਿੱਖਿਆ ਦਿੰਦੇ ਹਨ ਕਿ ਜਿਹੜਾ ਸਭ ਕਾਸੇ ਦਾ ਮਾਲਕ ਹੈ, ਜਿਸ ਦੇ ਅੱਗੇ ਹਰ ਕੰਮ ਦੀ ਪਰਖ-ਪੜਚੋਲ ਹੋਣੀ ਹੈ, ਜਿਸ ਨੇ ਨਿਆਂ ਕਰਨਾ ਹੈ, ਜਿਸ ਅੱਗੇ ਨਾ ਕੋਈ ਝੂਠ ਚੱਲਣਾ ਹੈ ਤੇ ਨਾ ਹੀ ਕੋਈ ਬਹਾਨਾ ਮਿਲਣਾ ਹੈ, ਉਸ ਦੀ ਸੇਵਾ ਕਰਨੀ ਚਾਹੀਦੀ ਹੈ। ਭਾਵ, ਉਸ ਦੀ ਰਜ਼ਾ ਵਿਚ ਰਹਿਣਾ ਚਾਹੀਦਾ ਹੈ ਤੇ ਹਰ ਕੰਮ ਉਸ ਦੀ ਰਜ਼ਾ ਅਨੁਸਾਰ ਹੀ ਕਰਨਾ ਚਾਹੀਦਾ ਹੈ। ਹਾਂ, ਇਸ ਨਾਲ ਹੀ ਮਨੁਖ ਦੇ ਮਨ ਦੀ ਸਾਰੀ ਭਟਕਣ ਦੂਰ ਹੋ ਜਾਵੇਗੀ ਜਾਂ ਉਸ ਨੂੰ ਆਪਣੇ ਮਨ ਦੀ ਦੁਬਿਧਾ ਦੂਰ ਕਰਕੇ ਮਾਲਕ ਪ੍ਰਭੂ ਦੀ ਰਜ਼ਾ ਵਿਚ ਰਾਜ਼ੀ ਰਹਿਣਾ ਚਾਹੀਦਾ ਹੈ।

ਫਿਰ ਦੱਸਿਆ ਹੈ ਕਿ ਜਿਹੜੇ ਚੰਗੇ ਮਨੁਖ ਹੁੰਦੇ ਹਨ, ਉਨ੍ਹਾਂ ਦਰਵੇਸ਼ ਲੋਕਾਂ ਨੂੰ ਮਨ ਦੀ ਸਾਰੀ ਭਟਕਣ ਛੱਡ ਕੇ, ਰਜ਼ਾ ਵਿਚ ਰਾਜ਼ੀ ਰਹਿਣ ਲਈ ਇਹੋ-ਜਿਹੀ ਸਹਿਣਸ਼ੀਲਤਾ ਅਪਣਾਉਣੀ ਚਾਹੀਦੀ ਹੈ, ਜਿਹੋ-ਜਿਹੀ ਰੁੱਖਾਂ ਵਿਚ ਹੁੰਦੀ ਹੈ। ਜਿਸ ਤਰ੍ਹਾਂ ਰੁੱਖ ਹਰ ਮੌਸਮ ਅਤੇ ਝੱਖੜ ਆਦਿ ਦੀ ਕਦੇ ਵੀ ਸ਼ਿਕਾਇਤ ਨਹੀਂ ਕਰਦੇ, ਇਸ ਤਰ੍ਹਾਂ ਮਨੁਖ ਨੂੰ ਵੀ ਰੱਬ ਦੇ ਹੁਕਮ ਵਿਚ ਧੀਰਜ ਨਾਲ ਰਹਿਣਾ ਚਾਹੀਦਾ ਹੈ।