ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਬਾਬਾ ਫਰੀਦ ਜੀ ਸਮਝਾ ਰਹੇ ਹਨ ਕਿ ਮਨੁਖ ਦਾ ਜੀਵਨ ਬਹੁਤਾ ਲਮੇਰਾ ਨਹੀਂ ਹੈ। ਇਹ ਜ਼ਿੰਦਗੀ ਸਾਨੂੰ ਉਧਾਰੀ ਮਿਲੀ ਹੋਈ ਹੈ। ਉਧਾਰੀ ਚੀਜ ਉਪਰ ਮਾਣ ਕਿਸ ਤਰ੍ਹਾਂ ਹੋ ਸਕਦਾ ਹੈ? ਉਧਾਰੀ ਚੀਜ ਦਾ ਮਾਲਕ ਜਦੋਂ ਚਾਹੇ ਆਪਣੀ ਚੀਜ ਵਾਪਸ ਲੈ ਸਕਦਾ ਹੈ। ਮਨੁਖ ਦੇ ਜੀਵਨ ਦਾ ਸਫਰ ਬਸ ਏਨਾ ਕੁ ਹੈ ਜਿਵੇਂ ਕੋਈ ਆਪਣੇ ਕੋਠੇ ’ਤੇ ਦੌੜ ਸਕਦਾ ਹੈ। ਮਨੁਖ ਦੇ ਜੀਵਨ ਦੀ ਦੌੜ ਝਟ-ਪਟ ਮੁੱਕ ਜਾਣ ਵਾਲੀ ਹੈ। ਉਸ ਦਾ ਅੰਤ ਬੇਹੱਦ ਨੇੜੇ ਹੈ। ਇਸ ਲਈ ਉਸ ਨੂੰ ਆਪਣੀ ਨੀਂਦ ਜਿਹੇ ਅਵੇਸਲੇਪਣ ਦਾ ਤਿਆਗ ਕਰ ਕੇ ਪਿਆਰੇ ਪ੍ਰਭੂ ਵੱਲ ਧਿਆਨ ਕਰਨਾ ਚਾਹੀਦਾ ਹੈ। ਉਸ ਨਾਲ ਮਿਲਣ ਦਾ ਕੋਈ ਜਤਨ ਕਰਨਾ ਚਾਹੀਦਾ ਹੈ।

ਕਿਉਂਕਿ ਜਿੰਨੀ ਕੁ ਵੀ ਮਨੁਖ ਦੀ ਉਮਰ ਹੁੰਦੀ ਹੈ ਉਹ ਬਹੁਤੀ ਨਹੀਂ, ਬਸ ਗਿਣੇ-ਚੁਣੇ ਦਿਨ ਹੀ ਹੁੰਦੇ ਹਨ। ਪਰ ਮਨੁਖ ਸਾਰਾ ਸਮਾਂ ਬੇਮਤਲਬ ਦੌੜ-ਭੱਜ ਕੇ ਵਿਅਰਥ ਬਤੀਤ ਕਰ ਲੈਂਦਾ ਹੈ। ਸਮੇਂ ਦਾ ਉਹ ਸਹੀ-ਸਹੀ ਲਾਹਾ ਨਹੀਂ ਲੈਂਦਾ। ਇਸ ਲਈ ਬਹੁਤ ਜਰੂਰੀ ਹੈ ਕਿ ਮਨੁਖ ਨੇਕ ਕਰਮ ਕਰੇ, ਨਾਮ ਜਪੇ ਅਤੇ ਬੁਰੇ ਕੰਮਾਂ ਤੋਂ ਦੂਰ ਰਹੇ। ਸੋ, ਮਨੁਖ ਨੂੰ ਸਮੇਂ ਸਿਰ ਪ੍ਰਭੂ ਦੇ ਰਾਹ ਪੈਣਾ ਚਾਹੀਦਾ ਹੈ।