ਸਲੋਕ ਸੇਖ ਫਰੀਦ ਜੀ

ਸੇਖ ਫਰੀਦ

ਇਸ ਸਲੋਕ ਵਿਚ ਦੱਸਿਆ ਗਿਆ ਹੈ ਕਿ ਜੇ ਕੋਈ ਬੰਦਾ ਸਬਰ-ਸੰਤੋਖ ਉੱਤੇ ਦ੍ਰਿੜਤਾ ਨਾਲ ਪਹਿਰਾ ਦੇਵੇ ਤਾਂ ਇਹ ਬੜਾ ਹੀ ਸੁਆਦਲਾ ਹੈ। ਅਖਾਣ ਵੀ ਹੈ ਕਿ ਸਬਰ ਦਾ ਫਲ ਮਿੱਠਾ ਹੁੰਦਾ ਹੈ। ਬੇਸ਼ਕ ਇਥੇ ਮਿੱਠੇ ਤੋਂ ਭਾਵ ਖਾਣੇ ਵਾਲਾ ਮਿੱਠਾ ਸੁਆਦ ਨਹੀਂ ਹੈ। ਇਥੇ ਮਿੱਠੇ ਤੋਂ ਭਾਵ ਲਾਭਦਾਇਕ ਤੇ ਦਿਲਚਸਪ ਹੈ। ਸਬਰ ਜੀਵਨ ਲਈ ਲਾਭਦਾਇਕ ਵੀ ਸਿਧ ਹੁੰਦਾ ਹੈ ਤੇ ਦਿਲਚਸਪ ਵੀ। ਅਸਲ ਵਿਚ ਸਬਰ ਕੋਈ ਕਮਜੋਰੀ ਨਹੀਂ, ਇਕ ਤਾਕਤ ਅਤੇ ਸਮਰੱਥਾ ਹੈ, ਜੋ ਮਨੁਖ ਨੂੰ ਜੀਵਨ ਵਿਚ ਸਫਲਤਾ ਦੇ ਰਾਹ ਤੁਰਨਾ ਸਿਖਾਉਂਦੀ ਹੈ। ਰੱਬੀ-ਮਿਲਾਪ ਵਿਚ ਖਾਸ ਤੌਰ ਪਰ ਸਬਰ ਦਾ ਵਡਾ ਯੋਗਦਾਨ ਹੁੰਦਾ ਹੈ। ਸਬਰ-ਸੰਤੋਖ ਬਗੈਰ ਮਨੁਖ ਕਿਸੇ ਵੀ ਮੰਜ਼ਿਲ ’ਤੇ ਨਹੀਂ ਪੁੱਜ ਸਕਦਾ। ਇਸ ਤਰ੍ਹਾਂ ਸਬਰ ਬੰਦੇ ਨੂੰ ਵੀ ਅੱਕਣ, ਥੱਕਣ ਅਤੇ ਟੁੱਟਣ ਤੋਂ ਬਚਾਉਂਦਾ ਹੈ ਤੇ ਸਿਦਕੀ ਸਾਧਕ ਨੂੰ ਸਫਲਤਾ ਤਕ ਲੈ ਕੇ ਜਾਂਦਾ ਹੈ। 

ਬਾਬਾ ਫਰੀਦ ਦੱਸਦੇ ਹਨ ਸਬਰ-ਸੰਤੋਖ ਵਾਲੇ ਲੋਕਾਂ ਦੀ ਜੀਵਨ ਧਾਰਾ ਵਧ ਕੇ ਦਰਿਆ ਵਾਂਗ ਠਾਠਾਂ ਮਾਰਨ ਲੱਗਦੀ ਹੈ ਤੇ ਟੁੱਟ ਕੇ ਨਾਲੇ ਵਾਂਗ ਨਹੀਂ ਵਹਿੰਦੀ। ਸਬਰ ਵਿਹੂਣੇ ਲੋਕਾਂ ਦੀ ਜੀਵਨ ਧਾਰਾ ਤੰਗ ਹੁੰਦੀ ਹੈ ਤੇ ਸਬਰ-ਸੰਤੋਖ ਵਾਲਿਆਂ ਦਾ ਜੀਵਨ ਵਗਦਾ ਦਰਿਆ ਹੁੰਦਾ ਹੈ। ਸਬਰ ਮਨੁਖ ਨੂੰ ਵਿਸ਼ਾਲ ਹਿਰਦੇ ਦਾ ਮਾਲਕ ਬਣਾਉਂਦਾ ਹੈ ਤੇ ਇਹੀ ਵਿਸ਼ਾਲਤਾ ਰੱਬੀ ਰਾਹ ਵਿਚ ਸਹਾਈ ਹੁੰਦੀ ਹੈ। ਸਬਰ-ਸੰਤੋਖ ਤੇ ਸ਼ੁਕਰ ਕਰਨ ਵਾਲੇ ਲੋਕ ਇਸ ਤਰ੍ਹਾਂ ਰੱਬ ਨੂੰ ਜਾ ਮਿਲਦੇ ਹਨ ਤੇ ਖੁਦ ਰੱਬੀ ਰੂਪ ਹੋ ਜਾਂਦੇ ਹਨ, ਜਿਵੇਂ ਨਦੀਆਂ ਸਾਗਰ ਵਿਚ ਮਿਲ ਕੇ ਸਾਗਰ ਦਾ ਰੂਪ ਹੀ ਹੋ ਜਾਂਦੀਆਂ ਹਨ।