ਅਲਾਹਣੀਆ (ਮਹਲਾ ੧)

ਗੁਰੂ ਨਾਨਕ ਸਾਹਿਬ

ਇਸ ਪਦੇ ਵਿਚ ਦੱਸਿਆ ਗਿਆ ਹੈ ਕਿ ਸਮਰੱਥ ਪ੍ਰਭੂ ਨੂੰ ਜੋ ਕੁਝ ਵੀ ਚੰਗਾ ਲੱਗਦਾ ਹੈ, ਉਹੀ ਕੁਝ ਹੁੰਦਾ ਹੈ। ਅਸਲ ਵਿਚ ਕਰਨ-ਕਰਾਵਣਹਾਰ ਉਹ ਪ੍ਰਭੂ ਆਪ ਹੀ ਹੈ। ਇਸ ਦੁਨੀਆ ’ਤੇ ਕਿਸੇ ਜੀਵ ਦਾ ਜੇ ਕੋਈ ਕੰਮ ਬਣਨਾ ਹੁੰਦਾ ਹੈ ਤਾਂ ਉਸ ਵੱਲੋਂ ਕੀਤੀ ਕੋਸ਼ਿਸ਼ ਤਾਂ ਬਹਾਨਾ ਹੀ ਬਣਦੀ ਹੈ।

ਸੰਸਾਰ ਦੀ ਸਿਰਜਣਾ ਕਰਨ ਵਾਲਾ ਸੱਚ-ਸਰੂਪ ਪ੍ਰਭੂ ਧਰਤੀ ਅਤੇ ਸਮੁੰਦਰ ਵਿਚਕਾਰ ਹਰੇਕ ਥਾਂ ਵਸਿਆ ਹੋਇਆ ਹੈ, ਭਾਵ ਸਿਰਜਣਹਾਰ ਪ੍ਰਭੂ ਆਪਣੀ ਸਿਰਜਣਾ ਵਿਚ ਹੀ ਸਮਾਇਆ ਹੋਇਆ ਹੈ। ਉਹ ਹਰ ਥਾਂ, ਕਣ-ਕਣ ਵਿਚ ਮੌਜੂਦ ਹੈ।

ਆਪਣੀ ਸਿਰਜਣਾ ਵਿਚ ਵਸਣ ਵਾਲਾ ਸਿਰਜਣਹਾਰ ਪ੍ਰਭੂ ਏਨਾ ਵਿਸ਼ਾਲ ਹੈ ਕਿ ਉਸ ਦਾ ਅੰਦਾਜ਼ਾ ਹੀ ਨਹੀਂ ਲਾਇਆ ਜਾ ਸਕਦਾ। ਨਾ ਹੀ ਉਸ ਨੂੰ ਪੂਰਨ ਰੂਪ ਵਿਚ ਜਾਣਿਆ ਜਾਂ ਸਮਝਿਆ ਜਾ ਸਕਦਾ ਹੈ। 
 
ਇਸ ਸੰਸਾਰ ਵਿਚ ਉਸ ਮਨੁਖ ਦਾ ਜਨਮ ਅਤੇ ਜੀਵਨ ਹੀ ਸਫਲ ਹੁੰਦਾ ਹੈ, ਜਿਹੜਾ ਪ੍ਰਭੂ ਨੂੰ ਪੂਰਨ ਰੂਪ ਵਿਚ ਇਕਾਗਰ ਮਨ ਹੋ ਕੇ ਆਪਣੇ ਧਿਆਨ ਵਿਚ ਵਸਾਈ ਰਖਦਾ ਹੈ, ਭਾਵ ਜਿਹੜਾ ਬੇਕਾਰ ਕੰਮ-ਧੰਦਿਆਂ ਵਿਚ ਆਪਣਾ ਸਮਾਂ ਵਿਅਰਥ ਨਹੀਂ ਗਵਾਉਂਦਾ।

ਸਿਰਜਣ ਕਲਾ ਦਾ ਮਾਹਿਰ ਪ੍ਰਭੂ ਆਪਣੇ ਹੁਕਮ ਅਨੁਸਾਰ ਆਪ ਹੀ ਆਪਣੀ ਸਿਰਜਣਾ ਨੂੰ ਢਾਹ ਦਿੰਦਾ ਹੈ ਤੇ ਢਾਹ ਕੇ ਫਿਰ ਆਪ ਹੀ ਉਸ ਨੂੰ ਮੁੜ ਉਸਾਰ ਦਿੰਦਾ ਹੈ।

ਅਸਲ ਵਿਚ ਜੋ ਕੁਝ ਵੀ ਉਸ ਸਮਰੱਥ ਪ੍ਰਭੂ ਨੂੰ ਚੰਗਾ ਲੱਗਦਾ ਹੈ, ਉਹੀ ਕੁਝ ਹੁੰਦਾ ਹੈ। ਇਹ ਸੰਸਾਰ ਤਾਂ ਬਸ ਜਤਨ ਮਾਤਰ ਹੀ ਕਰਦਾ ਹੈ, ਭਾਵ ਸੰਸਾਰ ਦੇ ਕੀਤਿਆਂ ਕੁਝ ਨਹੀਂ ਹੁੰਦਾ। ਜੋ ਕੁਝ ਹੁੰਦਾ ਹੈ, ਪ੍ਰਭੂ ਆਪ ਕਰਦਾ ਹੈ।